SAASIA

FONOTELE A LE SAASIA 2011

Autu: Talanoa mai

(Speak to me in our gagana)

Iulai:  15-16, 2011

Aukilani (Auckland, NZ)

Sa faatumulia le falefono a le Iunivesite Faatekonolosi a Aukilani (Auckland University of Technology) i Manukau, Aukilani i le au-usufono e tusa ma le 140 – 200 usufono mai i aoga amata i pitonuu eseese o Niu Sila i le fonotele a le SAASIA (Sosaiete Aoga Amata Samoa I Aotearoa) faapea le usufono mai Le Fetuao Aoga Faasamoa i Hawaii; Elisapeta Tuupo-Alaimaleata.  Na amata le fonotele i se sauniga matagofie e le susuga ia Ata Milo (faifeau EFKS Otahuhu), ma na tatala aloaia ai e le susuga ia Dr Johan Rall mai le Aoga Faafaiaoga (School of Education) a le AUT.  O lana saunoaga na faa’autu i se fuaiupu e faapea:  “ we need to create our own frames for ourselves” e faamanatu ai i le au usufono le faatāua o a tatou lava tū ma aga faa Samoa.  Sa tali fuaitau le failautusi aoao a le SAASIA, le tofa ia Tulimalefasi Isabella Tanielu-Dick e faafetaia ai le saunoaga matagofie.

Sa fofogaina e le susuga ia Lydia Sosene se lipoti na tusia e le afioga i le faipule ia Su’a William Sio ona ua faafuase’i ona le auai i le fono.  Matagofie tapenaga  o faamaumauga (statistics) na faalauiloa e Lydia e ta’u mai ai le tulaga o gagana Pasifika iinei Aoteaora, aemaise ai foi le tulaga faale-aoaoina i totonu o potu aoga.  Na saunoa le taitaifono aoao o le SAASIA; Salā Faasaulala Tagoilelagi-Leota i le mafuaga na filifilia ai lea autu: Talanoa mai mo le fonotele.  E lē gata i lea e i ai foi ni mataupu na manatu Salā e ono momoli i le ofisa o le faipule; afioga ia Su’a William Sio ona o se ‘submission’ na ave a le SAASIA mo le ECE Taskforce ae foliga mai e le o amanaia se fautuaga.  Na saunoa foi Salā i ni faamaumauga o loo tuuaia ai le mafuli o aoga amata a le Pasifika i le ‘fluency’ o gagana a tamaiti, ae laititi se vaega aoga mo i latou pe a autovaa atu i aoga maualuluga.

O le afioga i le polofesa o tagata atumotu Tagaloatele Peggy Fairbairn-Dunlop (Founding Pacific Professor at AUT) sa fai ma saunoaga aami o le fonotele.  O se vaega pito sili ona faataua e le afioga ia Tagaloa, poo lava tapena faiaoga o aoga amata mo le aoaoina o alo ma fanau Samoa i totonu o aoga amata ina ia faaauupegaina i le matātā o le ‘resilience’, e tau ai i lenei seneturi.  O le isi vaega taua na ia faamalosia o le matafaioi faataitai (leadership), poo lava tapena le SAASIA ini taitai e ono momoliina alo ma fanau o Samoa i le isi seneturi.   Sa umusaina (launch) ai foi ma le upega tafailagi (website) a le SAASIA faapea le DVD/CD a le Sulatoga na gaosia e le afioga ia Leautuli’ilagi Sauvao.

E tusa ma le 17 folasaga na utu vai ai le mamalu o le fonotele, ma sa faamalieina i se taumafaiga a le au fai pepa.  O nei su’ifefiloi sa i ai ni folasaga tau le musika e pei ona saunoa i ai le susuga ia Lale Peteru (faatasi ma ni pesepesega a le Punialavaa), tulaga tau le taaalo (Irene Paleai), o ituaiga fesili e fai i tamaiti (Lila Tekene), o le itu faa-tekonolosi (Leautuli Sauvao, Tautua Aoga Amata, Feiloai ma uso ma Faatamalii Kesi) ma le anoanoa’i o le mau taleni ma faasoa i ia aso e lua.   O le isi vaega taua o lenei fonotele sa auai mai ni kamupani lolomi tusi; Masilamea Press (Massey University), Evaleon Books ma le Pasifika Education Centre (PEC) e faalauiloa i le mamalu o le fonotele le latou auaunaga.   Sa tuu le avanoa i faatinā o le SAASIA; Fereni Ete ma Iolesina Tagoilelagi mo se la fautuaga i le tapenaga o le isi fono i le 2013.  Na la’ua faafetaia le taitaifono aoao a le SAASIA  ma lana laulauafono i le matagofie o tapenaga o le fonotele.  Feiloai i le alofa o le Atua i le fonotele o le 2013.

Conference.pdf
Conference registration 2011
SAASIA CONFERENCE 2011 DRAFT PROGRAMME